تابعنا عبر |
|
|
الثائر تقدم لكم تقنية الاستماع الى مقالاتها علّم أي مقطع واستمع إليه
#الثائر
- الخوري كامل كامل
بتمثل مغارة الميلاد حدث خارق للطبيعه البشرية، بيتزيّن فيها كل بيت للتذكير بولادة يسوع المخلص اللي حمل السلام والفرح والرجا والحب لكل الناس، ليلة الميلاد بتجتمع العيلة حول المغارة للصلاة والتأمل وبيتبادلوا الامنيات الحلوة والهدايا وكأنو هالمولود الجديد هوي كل واحد من بيناتن، لانو أحلى هدية بالميلاد لكل إنسان هي الولادة الجديدة
وشجرة الميلاد إلها معاني كبيرة بالكتاب المقدس، بترمز لشجرة معرفة الخير والشر ومع ولادة يسوع آدم الجديد من العدرا مريم حواء الجديدة صارت بترمز لشجرة الحياة وبتكون مزيّنة برموز إلها معاني ميلادية حقيقية.
شجرة الميلاد عادة بتكون صنوبر أو تنوب أو سرو أو شجرة اصطناعية متل مظهر الشجرة الطبيعية دايماً خضرا وما فيها يباس لانو بتمثل الحياة ومابتكون غير هيك.
يعني مش كل ما طلع ع بال حدا يعمل هرم مخروطي من دواليب عتيقة صار شجرة الميلاد أو قناني بلاستيك فاضية أو بدو ينضف البيئة من التنك والحديد والنحاس ويعمل شكل بيشبه كل شي إلا شجرة الميلاد.
كل هالاشكال تعدي ع شجرة الميلاد وبتشوّه معناها الحقيقي، اللي بيدعي الإنسان للتجدد والتوبة وتكون أعمالو متل زينة الشجرة مضواية ومشعشعة ومليانة مسامحة ومساعدة وإحساس بالفقير والمحتاج.
يعني إذا اتطلعت بشكل الدواليب أو القناني أو العتايق أو المهملات المكبوبة ومرمية بالشارع أو بالحي يعني بدّك تقنعني إنها رمز سماوي لوعد الله للإنسان بالخلاص؟!!
وإذا تلونت هالاشكال بالاحمر والأخضر وتزينت بالصور بيتغير معناها؟!! إسمها زبالة ومش شجرة الميلاد..
يمكن منجهل إنو اللون الاحمر بيرمز لدم يسوع عالصليب كرمال خلاص البشر؟!!
ويمكن منجهل إنو اللون الاخضر للشجرة مش لأي شي ثاني بيرمز للشباب الدائم وديمومة الحياة رغم كل المآسي وأشكال الموت!! مش إذا اندهن الدولاب أو اندهنت القنينة أو التنكة بالاخضر بتصير شجرة... شجرة عيد الميلاد بتطلع صوب السما متل السهم وبترمز لصلوات وأمنيات المؤمنين المتجهة صوب الله.
يعني ما فينا نصلي قدام شقعة دواليب ولا قدام شقعة تنك ولا قدام شقعة قناني...
يمكن ما منعرف إنو الجرس اللي بيزين شجرة الميلاد بيرمز لنداء الرب لكل خروف ضال وهالجرس هو إنذار لكل شخص تيلاقي طريقو لعند يسوع "الراعي الصالح" اللي بيترك ال ٩٩ وبيلحق الخروف الضايع ولمن بيلاقيه بيحملو ع كتافو وبيفرح فيه مع كل الملايكة والقديسين..
والشموع على شجرة الميلاد بترمز لنور المسيح اللي ضوى عتمة البشرية لْكانت ماشية بالظلمة مش لعبة بتطفي وبتضوي وبتسحر العيون...
وع راس الشجرة في نجمة حلوة عادةً رب البيت بيحطها ليلة الميلاد وهي بترمز لنجمة الرعيان لْهديتن ع المغارة وهونيك شافت عيونن ولمست قلوبن خلاص البشرية يسوع المسيح...
تركونا نعيد الميلاد ميلاد يسوع من دون تشويه...
تركونا نعيّد الميلاد حسب توقيتنا يعني توقيت كنيستنا وعادات كنيستنا وإلهام الكتاب المقدس مش حسب توقيت العالم وعادات العالم وأفكار العالم...
تعوا نعيش سوى الميلاد بمعانيه الحقيقية من دون تجارة بضاعة وأفكار بالية، تعوا نصلي سوى لطفل المغارة تنولد من جديد ولادة روحية، فيها منتغير ومنتزبن بثمار الروح من "محبة فرح سلام، طول أناة لطف صلاح إيمان، وداعة تعفف"(غلاطية ٥ / ٢٢ - ٢٣)
وهيك بيصير كل واحد منّا قلبو مغارة يسوع وحياتو شجرة ميلاد..